dekh jazbaat-e-nazar sab raegan ho jaenge

dekh jazbāt-e-nazar sab rā.egāñ ho jā.eñge

vo nihāñ hī kab haiñ nādāñ jo 'ayāñ ho jā.eñge

kyā ḳhabar thī rāz-hā-e-dil zabāñ ho jā.eñge

mere do aañsū bhī merī dāstāñ ho jā.eñge

jaan kho kar ġham meñ jān-e-dāstāñ ho jā.eñge

ye nishānī chhoḌ kar ham be-nishāñ ho jā.eñge

āsmān-e-hashr hashr-e-āsmāñ ho jā.eñge

jab ba-tashrīh-e-javānī vo javāñ ho jā.eñge

be-ḳhudī ke bandagī ke zauq ke jazbāt ke

ek hī sajde meñ saare imtihāñ ho jā.eñge

ai ġhalat-andesh mere āñsuoñ ko tū na chheḌ

ye zamīñ par gir ga.e to āsmāñ ho jā.eñge

tū Thahar kar kaash dekhe vo bhī vaqt aane ko hai

tujh se kosoñ duur ai umr-e-ravāñ ho jā.eñge

kāmrāñ sābit vahī hoñge rah-e-maqsūd meñ

jo qadam barbād sa.ī-e-rā.egāñ ho jā.eñge

aaj sunte haiñ zamāne kī 'shifā' ham dāstāñ

kal zamāne ke liye ḳhud dāstāñ ho jā.eñge

dekh jazbaat-e-nazar sab raegan ho jaenge

wo nihan hi kab hain nadan jo 'ayan ho jaenge

kya KHabar thi raaz-ha-e-dil zaban ho jaenge

mere do aansu bhi meri dastan ho jaenge

jaan kho kar gham mein jaan-e-dastan ho jaenge

ye nishani chhoD kar hum be-nishan ho jaenge

aasman-e-hashr hashr-e-asman ho jaenge

jab ba-tashrih-e-jawani wo jawan ho jaenge

be-KHudi ke bandagi ke zauq ke jazbaat ke

ek hi sajde mein sare imtihan ho jaenge

ai ghalat-andesh mere aansuon ko tu na chheD

ye zamin par gir gae to aasman ho jaenge

tu Thahar kar kash dekhe wo bhi waqt aane ko hai

tujh se koson dur ai umr-e-rawan ho jaenge

kaamran sabit wahi honge rah-e-maqsud mein

jo qadam barbaad sai-e-raegan ho jaenge

aaj sunte hain zamane ki 'shifa' hum dastan

kal zamane ke liye KHud dastan ho jaenge