dekh kar rang unki mahfil ka

dekh kar rang un kī mahfil kā

ho gayā past hausla dil kā

kho gayā jab ḳhayāl-e-manzil meñ

mil gayā hai surāġh manzil kā

jab sitam sah ke log haiñ ḳhāmosh

hausla kyoñ baḌhe na qātil kā

aap dekheñ na tez nazroñ se

phuuT jā.egā aabla dil kā

pūchhte haiñ vo haal maiñ chup huuñ

aa gayā hai maqām mushkil kā

baiTh jaa.eñ jo do qadam chal kar

kyā nishāñ pā sakeñge manzil kā

aur ik vaar kī zarūrat hai

ye taqāzā hai tere bismil kā

ġham-o-hasrat kī saḳhtiyāñ to burā

chuur hai aa.ina mire dil kā

koshisheñ karke thak gayā 'gauhar'

phir bhī rasta milā na manzil kā

dekh kar rang un ki mahfil ka

ho gaya past hausla dil ka

kho gaya jab KHayal-e-manzil mein

mil gaya hai suragh manzil ka

jab sitam sah ke log hain KHamosh

hausla kyon baDhe na qatil ka

aap dekhen na tez nazron se

phuT jaega aabla dil ka

puchhte hain wo haal main chup hun

aa gaya hai maqam mushkil ka

baiTh jaen jo do qadam chal kar

kya nishan pa sakenge manzil ka

aur ek war ki zarurat hai

ye taqaza hai tere bismil ka

gham-o-hasrat ki saKHtiyan to bura

chur hai aaina mere dil ka

koshishen karke thak gaya 'gauhar'

phir bhi rasta mila na manzil ka