dekh kar wo mujhe hairan bhi ho sakta hai

dekh kar vo mujhe hairān bhī ho saktā hai

ab ke is baat kā imkān bhī ho saktā hai

apnī man-mohnī sūrat pe udāsī na bikher

is tarah koī pareshān bhī ho saktā hai

nafrateñ baḌhtī rahīñ gar isī raftār ke saath

ye hasīñ shahr to vīrān bhī ho saktā hai

ghar kī dahlīz pe mash.al liye maujūd huuñ maiñ

aane vaalā koī anjān bhī ho saktā hai

jab vo muñh pher ke jaate haiñ to maiñ sochtā huuñ

itnā zālim koī insān bhī ho saktā hai

apne aariz kī gulābī mere nazdīk na lā

aise bīnā.ī kā nuqsān bhī ho saktā hai

chal paḌeñ rāh-e-qanā.at pe agar ham 'rāhī'

ḳhatm ye hirs kā sartān bhī ho saktā hai

dekh kar wo mujhe hairan bhi ho sakta hai

ab ke is baat ka imkan bhi ho sakta hai

apni man-mohni surat pe udasi na bikher

is tarah koi pareshan bhi ho sakta hai

nafraten baDhti rahin gar isi raftar ke sath

ye hasin shahr to viran bhi ho sakta hai

ghar ki dahliz pe mashal liye maujud hun main

aane wala koi anjaan bhi ho sakta hai

jab wo munh pher ke jate hain to main sochta hun

itna zalim koi insan bhi ho sakta hai

apne aariz ki gulabi mere nazdik na la

aise binai ka nuqsan bhi ho sakta hai

chal paDen rah-e-qanaat pe agar hum 'rahi'

KHatm ye hirs ka sartan bhi ho sakta hai