dekh sare bhar gae bartan parai aag se

dekh saare bhar ga.e bartan parā.ī aag se

maiñ mukammal ho chukā raushan parā.ī aag se

ab tumhāre is alaav kā mujhe kyā fā.eda

jal gayā kab kā mirā dāman parā.ī aag se

terī lau se lag rahā hai ai mire dil ke charāġh

jaltā aayā hai tirā bachpan parā.ī aag se

kaise ho jā.ūñ achānak terī bāñhoñ meñ niDhāl

haath kaise khīñch luuñ fauran parā.ī aag se

vo miTātā naqsh hai phailā ke apnī raakh phir

ho gayā mānūs jo rahzan parā.ī aag se

tum basā rakhnā hamāre baa'd har shām-e-firāq

raakh kar lenā nahīñ sāvan parā.ī aag se

vo darīchoñ se huā dāḳhil mire ghar-bār meñ

maiñ bachātā kis tarah chilman parā.ī aag se

tere chhūne se hameñ jalne kī vo 'ādat paḌī

'umr bhar jalnā paḌā rasman parā.ī aag se

shāhzāda kho ke āḳhir apne ḳhvāboñ kā 'muqīm'

kaise ḳhush hogī koī dul.han parā.ī aag se

dekh sare bhar gae bartan parai aag se

main mukammal ho chuka raushan parai aag se

ab tumhaare is alaw ka mujhe kya faeda

jal gaya kab ka mera daman parai aag se

teri lau se lag raha hai ai mere dil ke charagh

jalta aaya hai tera bachpan parai aag se

kaise ho jaun achanak teri banhon mein niDhaal

hath kaise khinch lun fauran parai aag se

wo miTata naqsh hai phaila ke apni rakh phir

ho gaya manus jo rahzan parai aag se

tum basa rakhna hamare ba'd har sham-e-firaq

rakh kar lena nahin sawan parai aag se

wo darichon se hua daKHil mere ghar-bar mein

main bachata kis tarah chilman parai aag se

tere chhune se hamein jalne ki wo 'adat paDi

'umr bhar jalna paDa rasman parai aag se

shahzada kho ke aaKHir apne KHwabon ka 'muqim'

kaise KHush hogi koi dulhan parai aag se