dekha hai raqs-e-shoala gul-o-lala-zar ne

dekhā hai raqs-e-sho.ala gul-o-lāla-zār ne

ḳhud āshiyāñ ko aag lagā dī bahār ne

siine meñ ab kahīñ bhī ḳhizāñ kā nishāñ nahīñ

yuuñ gul khilā diye haiñ dil-e-dāġhdār ne

maiñ kar chukā thā zabt ġham-e-ishq ko magar

luuTā mirā sukūn dil-e-be-qarār ne

āñkhoñ meñ dam rukā hai laboñ par hai terā naam

zinda faqat rakhā hai tire intizār ne

dohrā diyā tabāhī kā afsāna baar baar

sāz-e-dil-e-shikasta ke har ek taar ne

bahbūdī-e-chaman ke the sab mudda.ī magar

chhoḌā hai apnā farz har ik zimma-dār ne

hañs hañs ke un kā kahnā shab-e-vasl meñ 'riyāz'

be-bas kiyā hai aap ke qaul-o-qarār ne

dekha hai raqs-e-shoala gul-o-lala-zar ne

KHud aashiyan ko aag laga di bahaar ne

sine mein ab kahin bhi KHizan ka nishan nahin

yun gul khila diye hain dil-e-daghdar ne

main kar chuka tha zabt gham-e-ishq ko magar

luTa mera sukun dil-e-be-qarar ne

aankhon mein dam ruka hai labon par hai tera nam

zinda faqat rakha hai tere intizar ne

dohra diya tabahi ka afsana bar bar

saz-e-dil-e-shikasta ke har ek tar ne

bahbudi-e-chaman ke the sab muddai magar

chhoDa hai apna farz har ek zimma-dar ne

hans hans ke un ka kahna shab-e-wasl mein 'riyaz'

be-bas kiya hai aap ke qaul-o-qarar ne