dekha na un ko jaan ke bach kar nikal gae

dekhā na un ko jaan ke bach kar nikal ga.e

ye ek chaal ham bhī qayāmat kī chal ga.e

ham rāh-e-zindagī meñ bhaTak kar sañbhal ga.e

har qāfile ko chhoḌ ke aage nikal ga.e

ḳhushiyoñ kā zikr kyā ki fareb-e-hayāt thiiñ

ġham mo'atabar the ishq ke sāñche meñ Dhal ga.e

kyā ġham shab-e-alam kā ubharne do tīrgī

siine meñ sau charāġh sar-e-shām jal ga.e

dekhā jab ahl-e-bazm ne mujh kaj-kulāh ko

nazreñ badal ga.iiñ kabhī tevar badal ga.e

ai ham-nashīñ na pūchh ma.āl-e-shab-e-umīd

jo ḳhvāb ham ne dekhe the vo ḳhvāb jal ga.e

'azmat' ye kyā huā ki tumhāre tamām raaz

ashkoñ meñ Dhal ga.e kabhī sheroñ meñ Dhal ga.e

dekha na un ko jaan ke bach kar nikal gae

ye ek chaal hum bhi qayamat ki chal gae

hum rah-e-zindagi mein bhaTak kar sanbhal gae

har qafile ko chhoD ke aage nikal gae

KHushiyon ka zikr kya ki fareb-e-hayat thin

gham mo'atabar the ishq ke sanche mein Dhal gae

kya gham shab-e-alam ka ubharne do tirgi

sine mein sau charagh sar-e-sham jal gae

dekha jab ahl-e-bazm ne mujh kaj-kulah ko

nazren badal gain kabhi tewar badal gae

ai ham-nashin na puchh maal-e-shab-e-umid

jo KHwab hum ne dekhe the wo KHwab jal gae

'azmat' ye kya hua ki tumhaare tamam raaz

ashkon mein Dhal gae kabhi sheron mein Dhal gae