dekhe shakl-e-barq-e-alam-tab us dildar ki

dekhe shakl-e-barq-e-ālam-tāb us dildār kī

hai ye diida hai ye jur.at nargis-e-bīmār kī

vo but-e-nākām mujh ko dekhne aatā hai kab

naza.a meñ pathrā ga.iiñ jab aañkh mujh bīmār kī

aur tū legā nahīñ koī shab-e-furqat ḳhabar

aane jaane vaalī bas ik saañs hai bīmār kī

haif jaisā huuñ na martā huuñ tumhāre hijr meñ

kashmakash meñ jaan hai mujh āshiq-e-bīmār kī

ab to le us kī ḳhabar lillāh ai īsā-nafas

hai digar-gūñ in dinoñ hālat tire bīmār kī

ik nazar tum dekh lo us ko to sehat hai use

āzmūda ye davā hai aañkh ke bīmār kī

ik nazar us ko bhī dekho had se guzrā intizār

ab to pathrā.ī haiñ āñkheñ nargis-e-bīmār kī

dil farishtoñ ke dahal jaate haiñ 'sābir' ḳhauf se

arsh tak jaatī hai jab fariyād mujh bīmār kī

dekhe shakl-e-barq-e-alam-tab us dildar ki

hai ye dida hai ye jurat nargis-e-bimar ki

wo but-e-nakaam mujh ko dekhne aata hai kab

naza mein pathra gain jab aankh mujh bimar ki

aur tu lega nahin koi shab-e-furqat KHabar

aane jaane wali bas ek sans hai bimar ki

haif jaisa hun na marta hun tumhaare hijr mein

kashmakash mein jaan hai mujh aashiq-e-bimar ki

ab to le us ki KHabar lillah ai isa-nafas

hai digar-gun in dinon haalat tere bimar ki

ek nazar tum dekh lo us ko to sehat hai use

aazmuda ye dawa hai aankh ke bimar ki

ek nazar us ko bhi dekho had se guzra intizar

ab to pathrai hain aankhen nargis-e-bimar ki

dil farishton ke dahal jate hain 'sabir' KHauf se

arsh tak jati hai jab fariyaad mujh bimar ki