dekhiye kitne suKHan-fahm suKHan-war aae

dekhiye kitne suḳhan-fahm suḳhan-var aa.e

maiñ ne ik phuul uThāyā ka.ī patthar aa.e

kar chuke tark-e-ta'alluq to use sochnā kyā

dil se niklā hai to vo yaad bhī kyuuñ kar aa.e

phir vahī raat ho bādal hoñ havā chaltī ho

phir vahī chāñd daraḳhtoñ se nikal kar aa.e

raah hamvār muqaddar meñ nahīñ thī shāyad

paañv niklā thā abhī ghar se ki patthar aa.e

ek do gām-e-masāfat thī tirī galiyoñ kī

saarī duniyā kī thakan laad ke ham ghar aa.e

jang jaarī hai abhī jāgte rahiye shab-bhar

jaane kas oT se chhup kar koī lashkar aa.e

kyā koī ġham ke gañvāne kā hunar haath aayā

muskurāte hue jo ranj ke ḳhūgar aa.e

dekh kar jis kī jhalak jaan meñ jaan aatī thī

ab sar-e-rāh use dekh ke chakkar aa.e

is baras phuul ziyāda na sahī shāḳhoñ par

bārisheñ kam thiiñ magar rang barābar aa.e

ab to is niiñd meñ chalte hue uktā ga.e ham

ab to behtar hai kisī moḌ pe Thokar aa.e

ek do pal to farāmosh bhī kar deñ us ko

haañ agar shaḳhs koī yaad barābar aa.e

ġham-gusāroñ meñ mire chāragaroñ meñ aksar

mere dushman bhī ka.ī bhes badal kar aa.e

log kis ḳhvāb se rote hue uTThe 'jānāñ'

jaane kis qarya-e-mātam se ye bāhar aa.e

dekhiye kitne suKHan-fahm suKHan-war aae

main ne ek phul uThaya kai patthar aae

kar chuke tark-e-ta'alluq to use sochna kya

dil se nikla hai to wo yaad bhi kyun kar aae

phir wahi raat ho baadal hon hawa chalti ho

phir wahi chand daraKHton se nikal kar aae

rah hamwar muqaddar mein nahin thi shayad

panw nikla tha abhi ghar se ki patthar aae

ek do gam-e-masafat thi teri galiyon ki

sari duniya ki thakan lad ke hum ghar aae

jang jari hai abhi jagte rahiye shab-bhar

jaane kas oT se chhup kar koi lashkar aae

kya koi gham ke ganwane ka hunar hath aaya

muskuraate hue jo ranj ke KHugar aae

dekh kar jis ki jhalak jaan mein jaan aati thi

ab sar-e-rah use dekh ke chakkar aae

is baras phul ziyaada na sahi shaKHon par

barishen kam thin magar rang barabar aae

ab to is nind mein chalte hue ukta gae hum

ab to behtar hai kisi moD pe Thokar aae

ek do pal to faramosh bhi kar den us ko

han agar shaKHs koi yaad barabar aae

gham-gusaron mein mere chaaragaron mein aksar

mere dushman bhi kai bhes badal kar aae

log kis KHwab se rote hue uTThe 'jaanan'

jaane kis qarya-e-matam se ye bahar aae