dekhna hai pyas ke sahra ka pas-manzar to aa

dekhnā hai pyaas ke sahrā kā pas-manzar to aa

ai samandar tū hamāre jism ke andar to aa

dekh phir jāmid manāzir ke lahakne kā samāñ

ai nashāt-e-harf-e-tāza tū mire lab par to aa

ik sukūt-e-bekarāñ rag-rag meñ hai utrā huā

tū uThā saktā hai apne ḳhuun se mahshar to aa

qatra qatra de chukā huuñ apne hī ḳhuuñ kā qisās

ab bhī tishna hai tire insāf kā ḳhanjar to aa

maiñ ḳhudā kī tarh tanhā.ī ke sho'loñ meñ jalūñ

tū bhī hai is karb-e-tanhā.ī kā paiġhambar to aa

dekh raushan ho ga.e haiñ naqsh-e-lauh-e-āftāb

shāhzāde ab tilism-e-ḳhvāb se bāhar to aa

dekhna hai pyas ke sahra ka pas-manzar to aa

ai samandar tu hamare jism ke andar to aa

dekh phir jamid manazir ke lahakne ka saman

ai nashat-e-harf-e-taza tu mere lab par to aa

ek sukut-e-bekaran rag-rag mein hai utra hua

tu uTha sakta hai apne KHun se mahshar to aa

qatra qatra de chuka hun apne hi KHun ka qisas

ab bhi tishna hai tere insaf ka KHanjar to aa

main KHuda ki tarh tanhai ke sho'lon mein jalun

tu bhi hai is karb-e-tanhai ka paighambar to aa

dekh raushan ho gae hain naqsh-e-lauh-e-aftab

shahzade ab tilism-e-KHwab se bahar to aa