dekhna hai yun bhi kuchh taskin pa sakta hun main

dekhnā hai yuuñ bhī kuchh taskīn pā saktā huuñ maiñ

zabt-e-hasrat ek do aañsū bahā saktā huuñ maiñ

koshisheñ nākām ummīdoñ kī duniyā pā.emāl

zindagī ko zindagī kis tarah pā saktā huuñ maiñ

fasl-e-gul mahkī huī rāteñ vafūr-e-be-ḳhudī

is fasāne ko haqīqat bhī banā saktā huuñ maiñ

sochnā thā apnī barbādī se pahle hī mujhe

aadmī hote hue Thokar bhī khā saktā huuñ maiñ

farq-e-nauiyat hai lekin ishq bhī muḳhtār hai

muskurā sakte haiñ vo aañsū bahā saktā huuñ maiñ

ab bhī duniyā meñ vafā kā naam baaqī hai 'sahar'

bhūlne vaale ko ab bhī yaad aa saktā huuñ maiñ

dekhna hai yun bhi kuchh taskin pa sakta hun main

zabt-e-hasrat ek do aansu baha sakta hun main

koshishen nakaam ummidon ki duniya paemal

zindagi ko zindagi kis tarah pa sakta hun main

fasl-e-gul mahki hui raaten wafur-e-be-KHudi

is fasane ko haqiqat bhi bana sakta hun main

sochna tha apni barbaadi se pahle hi mujhe

aadmi hote hue Thokar bhi kha sakta hun main

farq-e-nauiyat hai lekin ishq bhi muKHtar hai

muskura sakte hain wo aansu baha sakta hun main

ab bhi duniya mein wafa ka nam baqi hai 'sahar'

bhulne wale ko ab bhi yaad aa sakta hun main