dekhne wale ye bole chashm-ha-e-yar ke

dekhne vaale ye bole chashm-hā-e-yār ke

ye to mastāne haiñ shāyad ḳhāna-e-ḳhammār ke

dil mirā shāyad hai shaidāoñ meñ tīr-e-yār ke

zaḳhm-hā-e-dil mushābah haiñ lab-e-sofār ke

paar utārā bahr-e-nā-paidā-kanār-e-ishq se

sadqe jā.ūñ kyoñ na terī teġh-e-langar-dār ke

uTh sakā hargiz kisī sūrat na terā nā-tavāñ

dab gayā jo nīche tere sāya-e-dīvār ke

kyā ḳhabar us ko ki kab raat aa.ī aur kab din gayā

roz-o-shab yaksāñ haiñ aage chashm-e-shab-bedār ke

jāñ-fazā.ī ġham-rubā.ī dilkashī farhat-dahī

haiñ ḳhavās-e-ḳhās ye ḳhāk-e-dar-e-dildār ke

jo dikhā de jalva rū-e-shāhid-e-maqsūd kā

sadqe saaqī is sharāb-e-ā.ina-kirdār ke

ishq meñ us but ke rahbān-o-shuyūḳh-o-barhaman

haiñ ye sab ke sab muqayyad rishta-e-zunnār ke

bole behtar hai husūl-e-ārzū se aarzū

vaah sadqe jā.iye is pahlū-e-inkār ke

ġham uThānā zulm sahnā sabr karnā yā ki shukr

kaun hai husn-e-amal laa.eq tirī sarkār ke

kyoñ na maiñ samjhūñ ki mujh ko mil ga.ī dād-e-suḳhan

vo bahut shā.eq haiñ ai 'bedil' mire ash.ār ke

dekhne wale ye bole chashm-ha-e-yar ke

ye to mastane hain shayad KHana-e-KHammar ke

dil mera shayad hai shaidaon mein tir-e-yar ke

zaKHm-ha-e-dil mushabah hain lab-e-sofar ke

par utara bahr-e-na-paida-kanar-e-ishq se

sadqe jaun kyon na teri tegh-e-langar-dar ke

uTh saka hargiz kisi surat na tera na-tawan

dab gaya jo niche tere saya-e-diwar ke

kya KHabar us ko ki kab raat aai aur kab din gaya

roz-o-shab yaksan hain aage chashm-e-shab-bedar ke

jaan-fazai gham-rubai dilkashi farhat-dahi

hain KHawas-e-KHas ye KHak-e-dar-e-dildar ke

jo dikha de jalwa ru-e-shahid-e-maqsud ka

sadqe saqi is sharab-e-aina-kirdar ke

ishq mein us but ke rahban-o-shuyuKH-o-barhaman

hain ye sab ke sab muqayyad rishta-e-zunnar ke

bole behtar hai husul-e-arzu se aarzu

wah sadqe jaiye is pahlu-e-inkar ke

gham uThana zulm sahna sabr karna ya ki shukr

kaun hai husn-e-amal laeq teri sarkar ke

kyon na main samjhun ki mujh ko mil gai dad-e-suKHan

wo bahut shaeq hain ai 'bedil' mere ashaar ke