dekhne walo kaho dil mein kasak hai ki nahin

dekhne vaalo kaho dil meñ kasak hai ki nahīñ

un ke chehre pe mire ġham kī jhalak hai ki nahīñ

aap ke hijr meñ rotā hai ye dil aaTh pahar

dekhiye nam mire ashkoñ se palak hai ki nahīñ

tund lahje meñ kiyā tū ne sadā mujh se kalām

terī āvāz meñ kuchh loch lachak hai ki nahīñ

be-ruḳhī se tirī dil merā huā hai ghāyal

aur zaḳhmoñ pe chhiḌakne ko namak hai ki nahīñ

sāya-e-zulf se mahrūm huā hai jis din

tere shaidā ko usī din se sanak hai ki nahīñ

bhuul jaatā hai har ik baar vo va.ade kar ke

dushmanī par mirī āmāda falak hai ki nahīñ

aadmī zulmat-e-qismat meñ rahegā kab tak

is kī taqdīr meñ tāroñ kī chamak hai ki nahīñ

ho gayā aaj mirā kulba-e-ahzāñ raushan

un ke aane se makāñ rashk-e-falak hai ki nahīñ

rā.egāñ ho nahīñ saktā kabhī ḳhūn-e-ushshāq

kūcha-e-yār ke zarroñ meñ chamak hai ki nahīñ

aap ke aane se kis darja milā us ko sukūñ

ruḳh-e-bīmār pe ḳhushiyoñ kī damak hai ki nahīñ

baa'd partav ke navā karte haiñ islāh-e-suḳhan

mere ash.ār meñ partav kī jhalak hai ki nahīñ

us kī ulfat meñ bahut bādiya-paimā.ī kī

ai 'fazā' paañv ke chhāloñ meñ tapak hai ki nahīñ

dekhne walo kaho dil mein kasak hai ki nahin

un ke chehre pe mere gham ki jhalak hai ki nahin

aap ke hijr mein rota hai ye dil aaTh pahar

dekhiye nam mere ashkon se palak hai ki nahin

tund lahje mein kiya tu ne sada mujh se kalam

teri aawaz mein kuchh loch lachak hai ki nahin

be-ruKHi se teri dil mera hua hai ghayal

aur zaKHmon pe chhiDakne ko namak hai ki nahin

saya-e-zulf se mahrum hua hai jis din

tere shaida ko usi din se sanak hai ki nahin

bhul jata hai har ek bar wo wade kar ke

dushmani par meri aamada falak hai ki nahin

aadmi zulmat-e-qismat mein rahega kab tak

is ki taqdir mein taron ki chamak hai ki nahin

ho gaya aaj mera kulba-e-ahzan raushan

un ke aane se makan rashk-e-falak hai ki nahin

raegan ho nahin sakta kabhi KHun-e-ushshaq

kucha-e-yar ke zarron mein chamak hai ki nahin

aap ke aane se kis darja mila us ko sukun

ruKH-e-bimar pe KHushiyon ki damak hai ki nahin

ba'd partaw ke nawa karte hain islah-e-suKHan

mere ashaar mein partaw ki jhalak hai ki nahin

us ki ulfat mein bahut baadiya-paimai ki

ai 'faza' panw ke chhaalon mein tapak hai ki nahin