dekhne walon ka anjam tumhein kya malum

dekhne vāloñ kā anjām tumheñ kyā ma.alūm

aa ga.e tum to lab-e-bām tumheñ kyā ma.alūm

tum hameñ bazm meñ be-sāḳhta dekhā na karo

log kar Dāleñge badnām tumheñ kyā ma.alūm

ham pe guzrī jo rah-e-ishq meñ ham jaan chuke

Thokareñ khā.īñ haiñ har gaam tumheñ kyā ma.alūm

zulf bikhrā ke bharī bazm meñ tum aa to ga.e

kyā ġhazab Dhā.egī ye shaam tumheñ kyā ma.alūm

apnī in mad-bharī āñkhoñ ko jhukāo na abhī

kitne ḳhālī haiñ abhī jaam tumheñ kyā ma.alūm

ham to qasdan hue maa.il mai-e-rusvā.ī par

ham ne kyoñ pī liyā ye jaam tumheñ kyā ma.alūm

shā.erī par tumheñ 'nayyar' kī ta.ajjub kyoñ hai

is pe hotā hai jo ilhām tumheñ kyā ma.alūm

dekhne walon ka anjam tumhein kya malum

aa gae tum to lab-e-baam tumhein kya malum

tum hamein bazm mein be-saKHta dekha na karo

log kar Dalenge badnam tumhein kya malum

hum pe guzri jo rah-e-ishq mein hum jaan chuke

Thokaren khain hain har gam tumhein kya malum

zulf bikhra ke bhari bazm mein tum aa to gae

kya ghazab Dhaegi ye sham tumhein kya malum

apni in mad-bhari aankhon ko jhukao na abhi

kitne KHali hain abhi jam tumhein kya malum

hum to qasdan hue mail mai-e-ruswai par

hum ne kyon pi liya ye jam tumhein kya malum

shaeri par tumhein 'nayyar' ki tajjub kyon hai

is pe hota hai jo ilham tumhein kya malum