dekho firaq-e-yar mein jaan kho raha hai wo

dekho firāq-e-yār meñ jaañ kho rahā hai vo

'shahzād' ko sambhālo bahut ro rahā hai vo

aa.e na.e jo zaḳhm to ye ruuh ne kahā

kuchh der baiTh jaao abhī so rahā hai vo

sahrā kī ḳhaak haq meñ mire kah rahī hai ye

jo honā chāhtā thā vahī ho rahā hai vo

pahle bhī ḳhālī haath thā hai ab bhī ḳhālī haath

aur kab se bār-e-sūd-o-ziyāñ Dho rahā hai vo

ai āsmāñ tū shukr adā us kā kījiyo

be-dil zamīñ ke siine meñ dil ho rahā hai vo

dekho kahāñ kise mile 'shahzād' dahr meñ

ham ne sunā hai ḳhud ko kahīñ kho rahā hai vo

dekho firaq-e-yar mein jaan kho raha hai wo

'shahzad' ko sambhaalo bahut ro raha hai wo

aae nae jo zaKHm to ye ruh ne kaha

kuchh der baiTh jao abhi so raha hai wo

sahra ki KHak haq mein mere kah rahi hai ye

jo hona chahta tha wahi ho raha hai wo

pahle bhi KHali hath tha hai ab bhi KHali hath

aur kab se bar-e-sud-o-ziyan Dho raha hai wo

ai aasman tu shukr ada us ka kijiyo

be-dil zamin ke sine mein dil ho raha hai wo

dekho kahan kise mile 'shahzad' dahr mein

hum ne suna hai KHud ko kahin kho raha hai wo