dekho to sahi zist ke imkan bhi honge

dekho to sahī ziist ke imkān bhī hoñge

shāyad ki isī bhiiḌ meñ insān bhī hoñge

gardan pe lage zaḳhm kī sozish se khulī aañkh

ham sochte the jang ke elaan bhī hoñge

allāh kisī ko kabhī bhūkā nahīñ rakhtā

dil us ne diyā hai to kuchh armān bhī hoñge

duniyā meñ koī chiiz bhī be-vaj.h nahīñ hai

maiñ huuñ to mire vāste maidān bhī hoñge

dekho kabhī duniyā to pareshān na honā

ab ḳhair se diide haiñ to hairān bhī hoñge

nekī kā badī se hai bahut paas kā rishta

in.aam ke nazdīk hī bohtān bhī hoñge

lāzim hai to malzūm bhī hogā yahīñ 'parvez'

jab zaḳhm mile haiñ to namakdān bhī hoñge

dekho to sahi zist ke imkan bhi honge

shayad ki isi bhiD mein insan bhi honge

gardan pe lage zaKHm ki sozish se khuli aankh

hum sochte the jang ke elan bhi honge

allah kisi ko kabhi bhuka nahin rakhta

dil us ne diya hai to kuchh arman bhi honge

duniya mein koi chiz bhi be-wajh nahin hai

main hun to mere waste maidan bhi honge

dekho kabhi duniya to pareshan na hona

ab KHair se dide hain to hairan bhi honge

neki ka badi se hai bahut pas ka rishta

inam ke nazdik hi bohtan bhi honge

lazim hai to malzum bhi hoga yahin 'parwez'

jab zaKHm mile hain to namakdan bhi honge