dekho to sirf haal faqiron ka dekhna

dekho to sirf haal faqīroñ kā dekhnā

kis ne kahā mizāj amīroñ kā dekhnā

sāhil paḌe haiñ thāme hue koī aa.ina

dariyā meñ duur aks jazīroñ kā dekhnā

kab ye ufuq ko kaun se paikar meñ Dhaal de

halchal sā bādaloñ kī lakīroñ kā dekhnā

jaise barahna shāḳh liye kah rahe haiñ kuchh

manzar ḳhizāñ kī rut meñ asīroñ kā dekhnā

kuchh muddaoñ meñ maanā irāde javāñ sahī

kuchh baat meñ ḳhayāl bhī pīroñ kā dekhnā

kam hai giraft kis kī kamāñ pe ḳhayāl rakh

taakā huā nishān na tīroñ kā dekhnā

vo qāfile amiir ke 'parvez' ik taraf

kuchh rahbaroñ meñ josh nazīroñ kā dekhnā

dekho to sirf haal faqiron ka dekhna

kis ne kaha mizaj amiron ka dekhna

sahil paDe hain thame hue koi aaina

dariya mein dur aks jaziron ka dekhna

kab ye ufuq ko kaun se paikar mein Dhaal de

halchal sa baadalon ki lakiron ka dekhna

jaise barahna shaKH liye kah rahe hain kuchh

manzar KHizan ki rut mein asiron ka dekhna

kuchh muddaon mein mana irade jawan sahi

kuchh baat mein KHayal bhi piron ka dekhna

kam hai giraft kis ki kaman pe KHayal rakh

taka hua nishan na tiron ka dekhna

wo qafile amir ke 'parwez' ek taraf

kuchh rahbaron mein josh naziron ka dekhna