dekhte dekhte kya se kya ho gaya

dekhte dekhte kyā se kyā ho gayā

maḳhmalī saayā sar se judā ho gayā

ret kī musht se musht bhiḌtī rahī

vaqt phislā yuuñ ham se ḳhafā ho gayā

ye galī rāsta ghar ke kamre sabhī

DhūñDte haiñ use jo havā ho gayā

ashk rukte nahīñ dard thamtā nahīñ

baiThe baiThe ye kyā hādisa ho gayā

rang aa.egā kyā nuur aa.egā kyā

yā vo biite paloñ kī sadā ho gayā

gar shikāyat thī ham se to kahte sahī

chhup ke jaane se kyā faisla ho gayā

apnā har ġham chhupānā thī aadat tirī

ādatan tū sabhī se ḳhafā ho gayā

tere hone se ḳhushiyāñ thiiñ hisse mere

ab ġhamoñ kā magar silsila ho gayā

jī bhī paa.eñ nahīñ mar bhī paa.eñ nahīñ

'sārthī' kyā ajab mājrā ho gayā

dekhte dekhte kya se kya ho gaya

maKHmali saya sar se juda ho gaya

ret ki musht se musht bhiDti rahi

waqt phisla yun hum se KHafa ho gaya

ye gali rasta ghar ke kamre sabhi

DhunDte hain use jo hawa ho gaya

ashk rukte nahin dard thamta nahin

baiThe baiThe ye kya hadisa ho gaya

rang aaega kya nur aaega kya

ya wo bite palon ki sada ho gaya

gar shikayat thi hum se to kahte sahi

chhup ke jaane se kya faisla ho gaya

apna har gham chhupana thi aadat teri

aadatan tu sabhi se KHafa ho gaya

tere hone se KHushiyan thin hisse mere

ab ghamon ka magar silsila ho gaya

ji bhi paen nahin mar bhi paen nahin

'sarthi' kya ajab majra ho gaya