dekhte kya did ke qabil koi manzar na tha

dekhte kyā diid ke qābil koī manzar na thā

paañv dhartī par na the aur āsmāñ sar par na thā

ḳhud hamīñ ko ḳhud-kushī kā shauq thā chāragaro

dostoñ kī āstīnoñ meñ koī ḳhanjar na thā

har paḌāv ek shab ke vāste manzil banā

jis kī ḳhātir dar-ba-dar bhaTke hamārā ghar na thā

qarz miTTī kā thā miTTī ke havāle kar diyā

vo jo ham ne dasht ko sauñpā hamārā sar na thā

barf mausam āñdhiyāñ shāḳh-o-shajar kuchh bhī na the

uḌne vāloñ ko magar andoh-e-bāl-o-par na thā

gumbad-e-koh-e-nidā se bach nikalnā thā muhāl

rāste chāroñ taraf the aur koī dar na thā

maiñ hī shā.ista na Thahrā sañgsārī kā ki aaj

sab uThe hāthoñ meñ parcham the koī patthar na thā

ham ne nazroñ se chhuā palkoñ se chūmā hai use

log kahte the ki ḳhushbū kā koī paikar na thā

dekhte kya did ke qabil koi manzar na tha

panw dharti par na the aur aasman sar par na tha

KHud hamin ko KHud-kushi ka shauq tha chaaragaro

doston ki aastinon mein koi KHanjar na tha

har paDaw ek shab ke waste manzil bana

jis ki KHatir dar-ba-dar bhaTke hamara ghar na tha

qarz miTTi ka tha miTTi ke hawale kar diya

wo jo hum ne dasht ko saunpa hamara sar na tha

barf mausam aandhiyan shaKH-o-shajar kuchh bhi na the

uDne walon ko magar andoh-e-baal-o-par na tha

gumbad-e-koh-e-nida se bach nikalna tha muhaal

raste chaaron taraf the aur koi dar na tha

main hi shaista na Thahra sangsari ka ki aaj

sab uThe hathon mein parcham the koi patthar na tha

hum ne nazron se chhua palkon se chuma hai use

log kahte the ki KHushbu ka koi paikar na tha