der ho jaegi phir kis ko sunai doge

der ho jā.egī phir kis ko sunā.ī doge

dasht ḳhud bol uThegā to duhā.ī doge

ab to is parda-e-aflāk se bāhar aa jaao

ham bhī ho jā.eñge munkir to dikhā.ī doge?

ab asīrān-e-qafas jaise qafas meñ bhī nahīñ

ab kahāñ hogī rihā.ī jo rihā.ī doge

sham.eñ raushan haiñ to kyā ālam-e-be-chehragī meñ

tum koī bhī ho magar kis ko sujhā.ī doge

ham to iz.hār ke qaa.el the hamesha kī tarah

kab tavaqqo thī ki naale ko rasā.ī doge

kyā ḳhabar thī mirī mehnat ke sile meñ tum bhī

mere hāthoñ meñ ye kashkol-e-gadā.ī doge

ham to is vasl-e-mukarrar pe bhī ḳhush the 'shahzād'

jab ye ma.alūm thā ik aur judā.ī doge

der ho jaegi phir kis ko sunai doge

dasht KHud bol uThega to duhai doge

ab to is parda-e-aflak se bahar aa jao

hum bhi ho jaenge munkir to dikhai doge?

ab asiran-e-qafas jaise qafas mein bhi nahin

ab kahan hogi rihai jo rihai doge

shamen raushan hain to kya aalam-e-be-chehragi mein

tum koi bhi ho magar kis ko sujhai doge

hum to izhaar ke qael the hamesha ki tarah

kab tawaqqo thi ki nale ko rasai doge

kya KHabar thi meri mehnat ke sile mein tum bhi

mere hathon mein ye kashkol-e-gadai doge

hum to is wasl-e-mukarrar pe bhi KHush the 'shahzad'

jab ye malum tha ek aur judai doge