der se rah pe aae ho magar aae ho

der se raah pe aa.e ho magar aa.e ho

merī rātoñ meñ sahar ban ke utar aa.e ho

yuuñ hai har samt mire ghar meñ charāġhāñ kī bahār

jaise ban-bās se tum lauT ke ghar aa.e ho

bhūlī yādeñ bhī dabe paañv chalī aa.ī haiñ

tum akele to nahīñ ho jo idhar aa.e ho

kis kamī kā huā pardes meñ tum ko ehsās

kuchh to hai tum jo achānak hī idhar aa.e ho

shoḳhiyāñ aisī bhī kis kaam kī ham baaz aa.e

tum to aate hī sharārat pe utar aa.e ho

saarī duniyā mirī āñkhoñ meñ simaT aa.ī hai

ba.ad muddat ke jo tum mujh ko nazar aa.e ho

ho ga.e ghar se sabhī ġham ke añdhere ruḳhsat

tum jo aa.e ho ba-andāz-e-sahar aa.e ho

ye bhī 'nasrīn' mohabbat kā karishma hai ki tum

saaf har moḌ se bach kar jo idhar aa.e ho

der se rah pe aae ho magar aae ho

meri raaton mein sahar ban ke utar aae ho

yun hai har samt mere ghar mein charaghan ki bahaar

jaise ban-bas se tum lauT ke ghar aae ho

bhuli yaaden bhi dabe panw chali aai hain

tum akele to nahin ho jo idhar aae ho

kis kami ka hua pardes mein tum ko ehsas

kuchh to hai tum jo achanak hi idhar aae ho

shoKHiyan aisi bhi kis kaam ki hum baz aae

tum to aate hi shararat pe utar aae ho

sari duniya meri aankhon mein simaT aai hai

baad muddat ke jo tum mujh ko nazar aae ho

ho gae ghar se sabhi gham ke andhere ruKHsat

tum jo aae ho ba-andaz-e-sahar aae ho

ye bhi 'nasrin' mohabbat ka karishma hai ki tum

saf har moD se bach kar jo idhar aae ho