dhaar si taza lahu ki shabnam-afshani mein hai

dhaar sī taaza lahū kī shabnam-afshānī meñ hai

sub.h ik bhīgī huī palkoñ kī tābānī meñ hai

aañkh hai labrez shāyad ro paḌegā tū abhī

jaise zillat kā mudāvā aañkh ke paanī meñ hai

maiñ nahīñ haarā tū mere hausle kī daad de

ik nayā azm-e-safar is ḳhasta-sāmānī meñ hai

be-samar be-rañg mausam barf kī sūrat safed

aur dil umDe hue rañgoñ kī tuġhyānī meñ hai

aag hai siine meñ tere maujzan tū yaad rakh

sham.a sī raushan añdhere ghar kī vīrānī meñ hai

an-ginat rañgoñ ke par bikhre paḌe haiñ har taraf

vaqt kā ghāyal parinda phir se jaulānī meñ hai

kis ghane jañgal meñ jā kar ab chhupeñ bastī ke log

aañkh sī ubhrī huī sūraj kī peshānī meñ hai

dhaar si taza lahu ki shabnam-afshani mein hai

subh ek bhigi hui palkon ki tabani mein hai

aankh hai labrez shayad ro paDega tu abhi

jaise zillat ka mudawa aankh ke pani mein hai

main nahin haara tu mere hausle ki dad de

ek naya azm-e-safar is KHasta-samani mein hai

be-samar be-rang mausam barf ki surat safed

aur dil umDe hue rangon ki tughyani mein hai

aag hai sine mein tere maujzan tu yaad rakh

shama si raushan andhere ghar ki virani mein hai

an-ginat rangon ke par bikhre paDe hain har taraf

waqt ka ghayal parinda phir se jaulani mein hai

kis ghane jangal mein ja kar ab chhupen basti ke log

aankh si ubhri hui suraj ki peshani mein hai