dhaDka hai rah-e-gham mein mera dil jagah-jagah

dhaḌkā hai rāh-e-ġham meñ mirā dil jagah-jagah

da.avā huā hai zabt kā bātil jagah-jagah

khoyā gayā huuñ rāh-e-vafā meñ kuchh is tarah

phirtī hai DhūñDhtī mujhe manzil jagah-jagah

bas ik nigāh-e-lutf kī hasrat liye hue

phirtā huuñ ban ke husn kā saa.il jagah-jagah

tūfān-e-bahr-e-ġham meñ yūñhī Dūb-Dūb kar

paidā kiye haiñ ishq ne sāhil jagah-jagah

jiite bane hai ġham meñ na marte bane hai ab

darpesh hai bas ik yahī mushkil jagah-jagah

rang-e-shafaq ye tābish-e-anjum ye bū-e-gul

hai ḳhūn-e-ārzū mirā shāmil jagah-jagah

dekhe to kaise husn-e-haqīqat-nishāñ ko aañkh

parde haiñ ehtiyāt ke haa.il jagah-jagah

hai zarra-zarra ḳhaak kā ik hashr darkinār

irfān-e-ġham huā mujhe hāsil jagah-jagah

aalam vo shauq kā hai ki rukte nahīñ qadam

maanā ki ġham hai dil se muqābil jagah-jagah

is justujū-e-husn ne āvāra kar diyā

phirtā hai mujh ko le ke mirā dil jagah-jagah

'sāhir' mujhe malāl kisī se ho kis liye

mere suḳhan ke aaj haiñ qaa.il jagah-jagah

dhaDka hai rah-e-gham mein mera dil jagah-jagah

dawa hua hai zabt ka baatil jagah-jagah

khoya gaya hun rah-e-wafa mein kuchh is tarah

phirti hai DhunDhti mujhe manzil jagah-jagah

bas ek nigah-e-lutf ki hasrat liye hue

phirta hun ban ke husn ka sail jagah-jagah

tufan-e-bahr-e-gham mein yunhi Dub-Dub kar

paida kiye hain ishq ne sahil jagah-jagah

jite bane hai gham mein na marte bane hai ab

darpesh hai bas ek yahi mushkil jagah-jagah

rang-e-shafaq ye tabish-e-anjum ye bu-e-gul

hai KHun-e-arzu mera shamil jagah-jagah

dekhe to kaise husn-e-haqiqat-nishan ko aankh

parde hain ehtiyat ke hail jagah-jagah

hai zarra-zarra KHak ka ek hashr darkinar

irfan-e-gham hua mujhe hasil jagah-jagah

aalam wo shauq ka hai ki rukte nahin qadam

mana ki gham hai dil se muqabil jagah-jagah

is justuju-e-husn ne aawara kar diya

phirta hai mujh ko le ke mera dil jagah-jagah

'sahir' mujhe malal kisi se ho kis liye

mere suKHan ke aaj hain qail jagah-jagah