dhaDka tha dil ki pyar ka mausam guzar gaya

dhaḌkā thā dil ki pyaar kā mausam guzar gayā

ham Dūbne chale the ki dariyā utar gayā

ḳhvāboñ kī vo matā-e-girāñ kis ne chhīn lī

kyā jāniye vo niiñd kā aalam kidhar gayā

tum se bhī jab nashāt kā ik pal na mil sakā

maiñ kāsa-e-savāl liye dar-ba-dar gayā

bhūle se kal jo aa.ina dekhā to zehn meñ

ik munhadim makān kā naqsha utar gayā

tez āñdhiyoñ meñ paañv zamīñ par na Tik sake

āḳhir ko maiñ ġhubār kī sūrat bikhar gayā

gahrā sukūt raat kī tanhā.iyāñ khañDar

aise meñ apne aap ko dekhā to Dar gayā

kahtā kisī se kyā ki kahāñ ghūmtā phirā

sab log so ga.e to maiñ chupke se ghar gayā

dhaDka tha dil ki pyar ka mausam guzar gaya

hum Dubne chale the ki dariya utar gaya

KHwabon ki wo mata-e-giran kis ne chhin li

kya jaaniye wo nind ka aalam kidhar gaya

tum se bhi jab nashat ka ek pal na mil saka

main kasa-e-sawal liye dar-ba-dar gaya

bhule se kal jo aaina dekha to zehn mein

ek munhadim makan ka naqsha utar gaya

tez aandhiyon mein panw zamin par na Tik sake

aaKHir ko main ghubar ki surat bikhar gaya

gahra sukut raat ki tanhaiyan khanDar

aise mein apne aap ko dekha to Dar gaya

kahta kisi se kya ki kahan ghumta phira

sab log so gae to main chupke se ghar gaya