dhaDkan hai misl-e-qafiya to zindagi radif

dhaḌkan hai misl-e-qāfiya to zindagī radīf

bichhḌe na zindagī se kabhī do ghaḌī radīf

kuchh is tarah se joḌe se juḌ jaa.e zindagī

jaise ki apnā qāfiya ḳhud DhūñDhtī radīf

yuuñ qāfiya radīf kā sadiyoñ kā saath hai

pahlī dafa radīf banā.ī ga.ī radīf

merī ġhazal meñ ye kisī mahbūb kī tarah

ḳhāmosh hai kahīñ to kahīñ boltī radīf

jab dhaḌkanoñ ke qāfiye kam paḌ ga.e to phir

ye misrā-e-hayāt se chaltī banī radīf

lafzoñ meñ zarf-e-misrā o ma.ānī ke baad bhī

har ek qāfiye kā bharam kholtī radīf

zīnat ġhazal kī hai to hañsī qāfiyoñ se hai

damdār qāfiye hoñ to phir boltī radīf

jaise kisī do-shāle ko doshīza oḌh le

'rāshid' ke har ḳhayāl ko yuuñ oḌhtī radīf

dhaDkan hai misl-e-qafiya to zindagi radif

bichhDe na zindagi se kabhi do ghaDi radif

kuchh is tarah se joDe se juD jae zindagi

jaise ki apna qafiya KHud DhunDhti radif

yun qafiya radif ka sadiyon ka sath hai

pahli dafa radif banai gai radif

meri ghazal mein ye kisi mahbub ki tarah

KHamosh hai kahin to kahin bolti radif

jab dhaDkanon ke qafiye kam paD gae to phir

ye misra-e-hayat se chalti bani radif

lafzon mein zarf-e-misra o maani ke baad bhi

har ek qafiye ka bharam kholti radif

zinat ghazal ki hai to hansi qafiyon se hai

damdar qafiye hon to phir bolti radif

jaise kisi do-shaale ko doshiza oDh le

'rashid' ke har KHayal ko yun oDhti radif