dhajji dhajji jubba-o-dastar hote dekhna

dhajjī dhajjī jubba-o-dastār hote dekhnā

'mīr' ko be-āshiqī bhī ḳhvār hote dekhnā

kasrat-e-dānishvarāñ ko qaht-e-dānish jānñā

vus.atoñ ko dasht kī dīvār hote dekhnā

rukne vaalī hai fishār-e-dam se nabz-e-inhirāf

ḳhud ko ab sar-tā-ba-pā inkār hote dekhnā

pīr-e-sad-sāla se sunñā qissa-e-āsūdgī

lamha lamha ziist ko dushvār hote dekhnā

dekhnā lafzoñ ko ma.anī se mafar karte hue

chup ke aalam meñ mirā iz.hār hote dekhnā

thiiñ jo kal tak shab-guzārī kā vasīla hijr meñ

ab unhīñ yādoñ ko tum āzār hote dekhnā

qasr-e-kohna ham ki kuchh mahsūs tak karte nahīñ

sirf apne aap ko mismār hote dekhnā

dhajji dhajji jubba-o-dastar hote dekhna

'mir' ko be-ashiqi bhi KHwar hote dekhna

kasrat-e-danishwaran ko qaht-e-danish jaanna

wusaton ko dasht ki diwar hote dekhna

rukne wali hai fishaar-e-dam se nabz-e-inhiraf

KHud ko ab sar-ta-ba-pa inkar hote dekhna

pir-e-sad-sala se sunna qissa-e-asudgi

lamha lamha zist ko dushwar hote dekhna

dekhna lafzon ko mani se mafar karte hue

chup ke aalam mein mera izhaar hote dekhna

thin jo kal tak shab-guzari ka wasila hijr mein

ab unhin yaadon ko tum aazar hote dekhna

qasr-e-kohna hum ki kuchh mahsus tak karte nahin

sirf apne aap ko mismar hote dekhna