Dhala jo din to gaya nur-e-aftab bhi sath

Dhalā jo din to gayā nūr-e-āftāb bhī saath

shabāb le gayā ra.anā.ī-e-shabāb bhī saath

vo saath thā to shab-e-zindagī charāġhāñ thī

jilau meñ rahte the anjum bhī māhtāb bhī saath

hayāt kyā hai faqat musta.ār-e-lamha-e-shauq

ye kah ke le ga.ī mauj-e-havā habāb bhī saath

isī meñ ḳhair hai nazreñ jhukī raheñ varna

nazar uThegī to jal jā.egā naqāb bhī saath

hamīñ se raunaq-e-hastī hai is ḳharābe meñ

jo ham miTe to miTegī ye āb-o-tāb bhī saath

hayāt dard kī tuġhyāniyoñ meñ Duubī hai

ġham-e-habīb bhī hai ziist ke azaab bhī saath

ḳhudā-e-arsh-e-suḳhan se huuñ faizyāb 'kalīm'

ki tūr-e-sher se laayā huuñ maiñ kitāb bhī saath

Dhala jo din to gaya nur-e-aftab bhi sath

shabab le gaya ranai-e-shabab bhi sath

wo sath tha to shab-e-zindagi charaghan thi

jilau mein rahte the anjum bhi mahtab bhi sath

hayat kya hai faqat mustaar-e-lamha-e-shauq

ye kah ke le gai mauj-e-hawa habab bhi sath

isi mein KHair hai nazren jhuki rahen warna

nazar uThegi to jal jaega naqab bhi sath

hamin se raunaq-e-hasti hai is KHarabe mein

jo hum miTe to miTegi ye aab-o-tab bhi sath

hayat dard ki tughyaniyon mein Dubi hai

gham-e-habib bhi hai zist ke azab bhi sath

KHuda-e-arsh-e-suKHan se hun faizyab 'kalim'

ki tur-e-sher se laya hun main kitab bhi sath