Dhali jo sham nazar se utar gaya suraj

Dhalī jo shaam nazar se utar gayā sūraj

havā kisī ne uḌā dī ki mar gayā sūraj

sahar huī nahīñ kab se guzishta shaam ke ba.ad

ġhurūb ho ki na jaane kidhar gayā sūraj

sajī huī hai sitāroñ kī anjuman ai dil

ki paara paara falak par bikhar gayā sūraj

lagā ki khīñch lī us ne zamīn pairoñ se

lagā ki talvoñ ko chhū kar guzar gayā sūraj

ye kaisā jalva ke bīnā.ī luT ga.ī merī

ki merī aañkh ke andar utar gayā sūraj

chhupā thā maslahatan shaam se sameT ke nuur

muhīb raat ye samjhī ki Dar gayā sūraj

shafaq tamām lahū-rañg ho gayā lekin

hujūm-e-ġham se bahut pur-jigar gayā sūraj

hamesha taaj kā iqbāl yuuñ buland rahā

jidhar jidhar nazar aayā udhar gayā sūraj

Dhali jo sham nazar se utar gaya suraj

hawa kisi ne uDa di ki mar gaya suraj

sahar hui nahin kab se guzishta sham ke baad

ghurub ho ki na jaane kidhar gaya suraj

saji hui hai sitaron ki anjuman ai dil

ki para para falak par bikhar gaya suraj

laga ki khinch li us ne zamin pairon se

laga ki talwon ko chhu kar guzar gaya suraj

ye kaisa jalwa ke binai luT gai meri

ki meri aankh ke andar utar gaya suraj

chhupa tha maslahatan sham se sameT ke nur

muhib raat ye samjhi ki Dar gaya suraj

shafaq tamam lahu-rang ho gaya lekin

hujum-e-gham se bahut pur-jigar gaya suraj

hamesha taj ka iqbaal yun buland raha

jidhar jidhar nazar aaya udhar gaya suraj