Dhalwan par gulab tarai mein ghas hai

Dhalvān par gulāb tarā.ī meñ ghaas hai

is ḳhitta-e-chaman ko mire ḳhuuñ kī pyaas hai

mausam kī āñdhiyoñ meñ bikhar jaa.e TuuT kar

is kārgāh-e-shīsha-garī ko ye raas hai

maiñ jāntā huuñ sharm se bojhal nigāh ko

ye nañgī ḳhvāhishoñ kā purānā libās hai

jo bujh chukā us ek sitāre kī raushnī

ab bhī savād-e-shahr-e-dil-o-jāñ ke paas hai

hai yaad aaj bhī unhī hoñToñ kā zā.iqa

hāthoñ meñ ab bhī us ke pasīne kī baas hai

dīvār par lagī huī tasvīr dekhnā

maazī kī dāstān kā ye iqtibās hai

ThiThurī huī hai ruuh chamaktā hai āftāb

donoñ ke darmiyān fasīl-e-havās hai

qasr-e-suḳhan meñ kholiye lafzoñ kī khiḌkiyāñ

is daur meñ bas ik yahī rāh-e-nikās hai

'irshād' saarī kāvisheñ bekār mahz haiñ

sarmā kī raat se tujhe hiddat kī aas hai

Dhalwan par gulab tarai mein ghas hai

is KHitta-e-chaman ko mere KHun ki pyas hai

mausam ki aandhiyon mein bikhar jae TuT kar

is kargah-e-shisha-gari ko ye ras hai

main jaanta hun sharm se bojhal nigah ko

ye nangi KHwahishon ka purana libas hai

jo bujh chuka us ek sitare ki raushni

ab bhi sawad-e-shahr-e-dil-o-jaan ke pas hai

hai yaad aaj bhi unhi honTon ka zaiqa

hathon mein ab bhi us ke pasine ki bas hai

diwar par lagi hui taswir dekhna

mazi ki dastan ka ye iqtibas hai

ThiThuri hui hai ruh chamakta hai aaftab

donon ke darmiyan fasil-e-hawas hai

qasr-e-suKHan mein kholiye lafzon ki khiDkiyan

is daur mein bas ek yahi rah-e-nikas hai

'irshad' sari kawishen bekar mahz hain

sarma ki raat se tujhe hiddat ki aas hai