dhire dhire aap ka gulshan mein aana yaad hai

dhīre dhīre aap kā gulshan meñ aanā yaad hai

chorī chorī mujh se vo āñkheñ churānā yaad hai

chalte chalte raah meñ aur bātoñ bātoñ meñ kabhī

vo tirā nazreñ milā kar muskurānā yaad hai

miT nahīñ saktī kabhī dil se adā-e-dil-navāz

naaz se mānind-e-āhū aanā jaanā yaad hai

haa.e vo mastī kā aalam vo nirālī shoḳhiyāñ

husn kī jādūgarī kā vo zamāna yaad hai

jin ġhalat-andāz nazroñ se kabhī dekhā mujhe

dil huā tīr-e-nazar kā bas nishāna yaad hai

kaale bādal kī tarah lahrā ga.ī zulf-e-siyāh

aur vo sāvan ghaTā kā kaañp jaanā yaad hai

vo jo guzrā thā kabhī is anjuman meñ ai 'asad'

zindagī kā besh-qīmat vo zamāna yaad hai

dhire dhire aap ka gulshan mein aana yaad hai

chori chori mujh se wo aankhen churana yaad hai

chalte chalte rah mein aur baaton baaton mein kabhi

wo tera nazren mila kar muskurana yaad hai

miT nahin sakti kabhi dil se ada-e-dil-nawaz

naz se manind-e-ahu aana jaana yaad hai

hae wo masti ka aalam wo nirali shoKHiyan

husn ki jadugari ka wo zamana yaad hai

jin ghalat-andaz nazron se kabhi dekha mujhe

dil hua tir-e-nazar ka bas nishana yaad hai

kale baadal ki tarah lahra gai zulf-e-siyah

aur wo sawan ghaTa ka kanp jaana yaad hai

wo jo guzra tha kabhi is anjuman mein ai 'asad'

zindagi ka besh-qimat wo zamana yaad hai