dhoka tere wajud se aage nikal gaya

dhoka tire vajūd se aage nikal gayā

yā'nī tū hast-o-būd se aage nikal gayā

ḳhushbū kī tarh phuul se maiñ phailtā rahā

aur is tarah vajūd se aage nikal gayā

mansūr sī 'atā huī dīvāngī mujhe

maiñ sajda-o-sujūd se aage nikal gayā

hai irtiqā-e-fard meñ jur.at kā ye maqām

jo jam gayā jumūd se aage nikal gayā

lā ke shu'ūr se mujhe laulāk mil gayā

aur maiñ tirī hudūd se aage nikal gayā

ḳhākistarī ko ḳhaak par aisā sukūñ milā

har naam har numūd se aage nikal gayā

apnī ḳhudī meñ Duub ke mujh ko ḳhudā milā

'hasrat' davā darūd se aage nikal gayā

dhoka tere wajud se aage nikal gaya

ya'ni tu hast-o-bud se aage nikal gaya

KHushbu ki tarh phul se main phailta raha

aur is tarah wajud se aage nikal gaya

mansur si 'ata hui diwangi mujhe

main sajda-o-sujud se aage nikal gaya

hai irtiqa-e-fard mein jurat ka ye maqam

jo jam gaya jumud se aage nikal gaya

la ke shu'ur se mujhe laulak mil gaya

aur main teri hudud se aage nikal gaya

KHakistari ko KHak par aisa sukun mila

har nam har numud se aage nikal gaya

apni KHudi mein Dub ke mujh ko KHuda mila

'hasrat' dawa darud se aage nikal gaya