dhoke khata raha bar bar aadmi

dhoke khātā rahā baar baar aadmī

phir bhī kartā rahā e.atibār aadmī

ghūmtā phirtā hai zehn-o-dil meñ liye

mas.ale zindagī ke hazār aadmī

apne matlab kī ḳhātir mire aap ke

Dāltā hai diloñ meñ darār aadmī

koī aatā nahīñ muddatoñ tak yahāñ

kis kā kartā hai ye intizār aadmī

mas.ale ranj-o-ġham jaal phailā.e haiñ

hotā rahtā hai har dam shikār aadmī

Thokareñ zaḳhm par zaḳhm khātā rahā

chāhtā hai magar eqtidār aadmī

ittifāqan hī tum ko mile to mile

shaḳhsiyat se bahut bā-vaqār aadmī

bebasī muflisī tang-dastī kā hai

chaltā phirtā huā ishtihār aadmī

bhuul hotī hai sarzad kabhī na kabhī

chāhe kitnā hī ho hoshiyār aadmī

nā-tavāñ zard chehroñ pe 'anjum' thakan

jis taraf dekhiye be-qarār aadmī

dhoke khata raha bar bar aadmi

phir bhi karta raha eatibar aadmi

ghumta phirta hai zehn-o-dil mein liye

masale zindagi ke hazar aadmi

apne matlab ki KHatir mere aap ke

Dalta hai dilon mein darar aadmi

koi aata nahin muddaton tak yahan

kis ka karta hai ye intizar aadmi

masale ranj-o-gham jal phailae hain

hota rahta hai har dam shikar aadmi

Thokaren zaKHm par zaKHm khata raha

chahta hai magar eqtidar aadmi

ittifaqan hi tum ko mile to mile

shaKHsiyat se bahut ba-waqar aadmi

bebasi muflisi tang-dasti ka hai

chalta phirta hua ishtihaar aadmi

bhul hoti hai sarzad kabhi na kabhi

chahe kitna hi ho hoshiyar aadmi

na-tawan zard chehron pe 'anjum' thakan

jis taraf dekhiye be-qarar aadmi