dhuan dhuan hain nigahon ki bastiyan kya kya

dhuāñ dhuāñ haiñ nigāhoñ kī bastiyāñ kyā kyā

chamak rahī haiñ ḳhayāloñ kī bijliyāñ kyā kyā

bhañvar kī aañkh se takte hī rah ga.e tūfāñ

pahuñch ga.ī haiñ kināroñ pe kashtiyāñ kyā kyā

milegī merī bhī kisht-e-nazar ko sairābī

har ek samt uchhaltī haiñ naddiyāñ kyā kyā

mirī nigāh ke dāman ko khīñch letī haiñ

tire ḳhayāl kī gul-posh vādiyāñ kyā kyā

sharāb-ḳhāne ke dīvār-o-dar damak uTThe

chhalak paḌīñ mire sāġhar se bijliyāñ kyā kyā

suḳhan ke shor meñ suntā nahīñ koī lekin

diloñ meñ guuñj rahī haiñ kahāniyāñ kyā kyā

'nadīm' sho.abada-e-zindagī se āḳhir-kār

lahak rahī haiñ nigāhoñ meñ khetiyāñ kyā kyā

dhuan dhuan hain nigahon ki bastiyan kya kya

chamak rahi hain KHayalon ki bijliyan kya kya

bhanwar ki aankh se takte hi rah gae tufan

pahunch gai hain kinaron pe kashtiyan kya kya

milegi meri bhi kisht-e-nazar ko sairabi

har ek samt uchhalti hain naddiyan kya kya

meri nigah ke daman ko khinch leti hain

tere KHayal ki gul-posh wadiyan kya kya

sharab-KHane ke diwar-o-dar damak uTThe

chhalak paDin mere saghar se bijliyan kya kya

suKHan ke shor mein sunta nahin koi lekin

dilon mein gunj rahi hain kahaniyan kya kya

'nadim' shoabada-e-zindagi se aaKHir-kar

lahak rahi hain nigahon mein khetiyan kya kya