dhundh mazi ki wo aab-e-chashm se dhone laga

dhundh maazī kī vo āb-e-chashm se dhone lagā

aa.ine meñ dekh kar mujh ko koī rone lagā

mil ga.e kuchh phuul sūkhe kal kitāboñ meñ mujhe

aur kisī kī yaad kā jangal harā hone lagā

ḳhvāb mujh ko phir pareshāñ kar rahe haiñ āj-kal

kaun jaane jism ke andar mire sone lagā

TuuT kar jaate hue tāroñ ne ye mujh se kahā

chāñd bhī ab āsmāñ meñ nafrateñ bone lagā

aa gayā ġhazloñ kā majmūa mirā bāzār meñ

dil kā saarā bojh ik dīvān ab Dhone lagā

pyaas kam hone lagī jab se samundar kī 'ratan'

bas usī din se nadī kā qad baḌā hone lagā

dhundh mazi ki wo aab-e-chashm se dhone laga

aaine mein dekh kar mujh ko koi rone laga

mil gae kuchh phul sukhe kal kitabon mein mujhe

aur kisi ki yaad ka jangal hara hone laga

KHwab mujh ko phir pareshan kar rahe hain aaj-kal

kaun jaane jism ke andar mere sone laga

TuT kar jate hue taron ne ye mujh se kaha

chand bhi ab aasman mein nafraten bone laga

aa gaya ghazlon ka majmua mera bazar mein

dil ka sara bojh ek diwan ab Dhone laga

pyas kam hone lagi jab se samundar ki 'ratan'

bas usi din se nadi ka qad baDa hone laga