dhundli dhundli yaadon mein ek raushan raushan chehra hai

dhuñdlī dhuñdlī yādoñ meñ ik raushan raushan chehra hai

jānā-pahchānā lagtā hai shāyad koī apnā hai

bikhre bikhre lamhoñ meñ ik aisā bhī to lamha hai

girte girte raste par jab us ne mujh ko thāmā hai

motī jaisī pyārī āñkheñ lekin in meñ aañsū kyoñ

furqat apnī chand roza hai ham ko to phir milnā hai

kitne nādāñ the ham donoñ duniyā se laḌ paḌte the

vaqt ne lekin yaad dilāyā duniyā meñ hī rahnā hai

dil ke TuuTe darvāze par phir ehsās ne dastak dī

raat ke kaale āñchal meñ phir koī taara chamkā hai

ThanDe ThanDe chāñd ke TukḌe uthle uthle dariyā meñ

niile piile charḳh-e-barīñ par sūraj jaltā bujhtā hai

chāñd sitāre phuul ujāle titlī kaliyāñ rang hazār

merā paikar to lagtā hai ik tasvīr kā hissa hai

kaisī achchhī dhuup khilī hai mere ujḌe āñgan meñ

āḳhirī ruḳhsat lene shāyad mere ghar vo aaya hai

tū ne to isrār kiyā thā mujh se ab vo rabt nahīñ

jaate jaate phir kyoñ tū ne mujh ko muḌ kar dekhā hai

us ke mere biich meñ haa.il ek lakīr na-dīda hai

jis ke aage paañv baḌhānā nā-mumkin sā lagtā hai

dhundli dhundli yaadon mein ek raushan raushan chehra hai

jaana-pahchana lagta hai shayad koi apna hai

bikhre bikhre lamhon mein ek aisa bhi to lamha hai

girte girte raste par jab us ne mujh ko thama hai

moti jaisi pyari aankhen lekin in mein aansu kyon

furqat apni chand roza hai hum ko to phir milna hai

kitne nadan the hum donon duniya se laD paDte the

waqt ne lekin yaad dilaya duniya mein hi rahna hai

dil ke TuTe darwaze par phir ehsas ne dastak di

raat ke kale aanchal mein phir koi tara chamka hai

ThanDe ThanDe chand ke TukDe uthle uthle dariya mein

nile pile charKH-e-barin par suraj jalta bujhta hai

chand sitare phul ujale titli kaliyan rang hazar

mera paikar to lagta hai ek taswir ka hissa hai

kaisi achchhi dhup khili hai mere ujDe aangan mein

aaKHiri ruKHsat lene shayad mere ghar wo aaya hai

tu ne to israr kiya tha mujh se ab wo rabt nahin

jate jate phir kyon tu ne mujh ko muD kar dekha hai

us ke mere bich mein hail ek lakir na-dida hai

jis ke aage panw baDhana na-mumkin sa lagta hai