dhum gum-gashta KHazanon ki machata phire kaun

dhuum gum-gashta ḳhazānoñ kī machātā phire kaun

in zamānoñ meñ jo the hī nahīñ jaatā phire kaun

baaġh meñ un se mulāqāt kā imkān bhī hai

sirf phūloñ ke liye lauT ke aatā phire kaun

siikh rakkhe haiñ parindoñ ne sab ashjār ke giit

āj-kal muuD hī aisā hai ki gaatā phire kaun

maiñ to kahtā huuñ yahīñ ġhaar meñ rah lo jab tak

vaqt pūchho hī nahīñ shahr basātā phire kaun

bhes badle hue ik shaḳhs kī ḳhātir hai ye sab

ham faqīroñ ke bhalā naaz uThātā phire kaun

ḳhvāb ya.anī ye shab-o-roz jise chāhiye hoñ

aa ke le jaa.e ab āvāz lagātā phire kaun

iḳhtilāfāt saroñ meñ haiñ gharoñ se baḌh kar

phir uThānī jo hai dīvār girātā phire kaun

dhum gum-gashta KHazanon ki machata phire kaun

in zamanon mein jo the hi nahin jata phire kaun

bagh mein un se mulaqat ka imkan bhi hai

sirf phulon ke liye lauT ke aata phire kaun

sikh rakkhe hain parindon ne sab ashjar ke git

aaj-kal muD hi aisa hai ki gata phire kaun

main to kahta hun yahin ghaar mein rah lo jab tak

waqt puchho hi nahin shahr basata phire kaun

bhes badle hue ek shaKHs ki KHatir hai ye sab

hum faqiron ke bhala naz uThata phire kaun

KHwab yani ye shab-o-roz jise chahiye hon

aa ke le jae ab aawaz lagata phire kaun

iKHtilafat saron mein hain gharon se baDh kar

phir uThani jo hai diwar giraata phire kaun