DhunDa teri zulf ka saya bhul hui sharminda hun

DhūñDā terī zulf kā saayā bhuul huī sharminda huuñ

pyāsā man thā dhokā khāyā bhuul huī sharminda huuñ

shahr kī raushan rāhoñ meñ bhī terī bāñheñ yaad aa.iiñ

ḳhud ko tanhā tanhā paayā bhuul huī sharminda huuñ

shahr-e-vafā ke saare raste terī jānib hī nikle

yā phir maiñ ne hosh gañvāyā bhuul huī sharminda huuñ

kaise kaise maqnātīsī ruup saje the raste meñ

lauT ke tere paas hī aayā bhuul huī sharminda huuñ

jaise koī ziddī bachcha rokā jaa.e magar na aa.e

tere dar ko des banāyā bhuul huī sharminda huuñ

is duniyā meñ aur bhī ġham the mīThe mīThe dard bhare

ġham terā hī chāhā paayā bhuul huī sharminda huuñ

begānoñ ne pyaar diyā to ham ne dāman khīñch liyā

apnoñ se hī rabt baḌhāyā bhuul huī sharminda huuñ

jis māhaul ke tapte mausam dukh hī dete the 'in.ām'

us par bhī sāvan barsāyā bhuul huī sharminda huuñ

DhunDa teri zulf ka saya bhul hui sharminda hun

pyasa man tha dhoka khaya bhul hui sharminda hun

shahr ki raushan rahon mein bhi teri banhen yaad aain

KHud ko tanha tanha paya bhul hui sharminda hun

shahr-e-wafa ke sare raste teri jaanib hi nikle

ya phir main ne hosh ganwaya bhul hui sharminda hun

kaise kaise maqnatisi rup saje the raste mein

lauT ke tere pas hi aaya bhul hui sharminda hun

jaise koi ziddi bachcha roka jae magar na aae

tere dar ko des banaya bhul hui sharminda hun

is duniya mein aur bhi gham the miThe miThe dard bhare

gham tera hi chaha paya bhul hui sharminda hun

beganon ne pyar diya to hum ne daman khinch liya

apnon se hi rabt baDhaya bhul hui sharminda hun

jis mahaul ke tapte mausam dukh hi dete the 'inam'

us par bhi sawan barsaya bhul hui sharminda hun