DhunDta sukun main tha paya ranj-o-gham ulTa

DhūñDtā sukūñ maiñ thā paayā ranj-o-ġham ulTā

manziloñ kī ḳhvāhish meñ rakh diyā qadam ulTā

jaate jaate qāsid ne kah diyā patā un kā

haa.e mere hāthoñ meñ aa gayā qalam ulTā

aaj gar gile shikve kar rahā thā vo lekin

bojh mere siine kā ho rahā thā kam ulTā

mujh ko saare manzar hī tab se ulTe lagte haiñ

zulf-e-yār ko dekhā jab se ḳham-ba-ḳham ulTā

pīchhe vāloñ ne apne hī ḳhilāf dī āvāz

aage vāloñ ne pakḌā thā yahāñ alam ulTā

jis ne merī sīrat ko daaġh daaġh likkhā hai

us kai hāthoñ maiñ paayā maiñ ne jām-e-jam ulTā

haath maiñ ne bhī yuuñ hī bārhā uThā.e the

us ne bhī mere aage rakh diyā sanam ulTā

kaise ab kisī se ham vāsta rakheñ 'rāsiḳh'

ab to bas mire andar pal rahā hai ġham ulTā

DhunDta sukun main tha paya ranj-o-gham ulTa

manzilon ki KHwahish mein rakh diya qadam ulTa

jate jate qasid ne kah diya pata un ka

hae mere hathon mein aa gaya qalam ulTa

aaj gar gile shikwe kar raha tha wo lekin

bojh mere sine ka ho raha tha kam ulTa

mujh ko sare manzar hi tab se ulTe lagte hain

zulf-e-yar ko dekha jab se KHam-ba-KHam ulTa

pichhe walon ne apne hi KHilaf di aawaz

aage walon ne pakDa tha yahan alam ulTa

jis ne meri sirat ko dagh dagh likkha hai

us kai hathon main paya main ne jam-e-jam ulTa

hath main ne bhi yun hi barha uThae the

us ne bhi mere aage rakh diya sanam ulTa

kaise ab kisi se hum wasta rakhen 'rasiKH'

ab to bas mere andar pal raha hai gham ulTa