DhunDte DhunDte hum aapko thak jate hain

DhūñDte DhūñDte ham aap ko thak jaate haiñ

rāste duur bahut duur talak jaate haiñ

koī aatā nahīñ bosīda se mere ghar meñ

kuchh parinde hī yahāñ aa ke chahak jaate haiñ

aib dahlīz pe daulat kī Dhake hote haiñ

muflisī aatī hai to parde masak jaate haiñ

daur-e-hāzir kī havāoñ kā asar to dekho

vaqt se pahle hī phal baaġh ke pak jaate haiñ

ahd karte haiñ na piine kā alassub.h magar

shaam ke aate hī paimāne chhalak jaate haiñ

aañsū ruḳhsār ko chhūne kī tamanna le kar

āñkhoñ ke kor se gāloñ pe Dhalak jaate haiñ

DhunDte DhunDte hum aap ko thak jate hain

raste dur bahut dur talak jate hain

koi aata nahin bosida se mere ghar mein

kuchh parinde hi yahan aa ke chahak jate hain

aib dahliz pe daulat ki Dhake hote hain

muflisi aati hai to parde masak jate hain

daur-e-hazir ki hawaon ka asar to dekho

waqt se pahle hi phal bagh ke pak jate hain

ahd karte hain na pine ka alassubh magar

sham ke aate hi paimane chhalak jate hain

aansu ruKHsar ko chhune ki tamanna le kar

aankhon ke kor se galon pe Dhalak jate hain