dhup aur chhaon ki fikron se nikalna hai mujhe

dhuup aur chhāoñ kī fikroñ se nikalnā hai mujhe

chal paḌā huuñ to usī raah pe chalnā hai mujhe

mujh se jo aage haiñ vo aage na chalne deñge

aage baḌhnā hai to phir raah badalnā hai mujhe

vaise is 'ahd kī qadroñ kā taqāza hai yahī

vaqt ke saath bahar-hāl badalnā hai mujhe

mere ḳhvāboñ kā bharam toḌne vaale ye batā

kab talak yūñhī ġham-e-'ishq meñ jalnā hai mujhe

zindagī ek mahaktā huā jaada hī nahīñ

sirf phūloñ pe kyā kāñToñ pe bhī chalnā hai mujhe

chāñd āñgan meñ na utre ye alag baat magar

ek bachche kī tarah roz machalnā hai mujhe

ġham kā sūraj na Dhalā hai na Dhalegā shāyad

barf kī tarh shab-o-roz pighalnā hai mujhe

mere maazī ne kiyā tark-e-ta'alluq mujh se

ab to har haal meñ tanhā hī sañbhalnā hai mujhe

nafrat-o-buġhz-o-hasad kī vo ghuTan hai 'gulshan'

kuchh bhī ho jaa.e ye māhaul badalnā hai mujhe

dhup aur chhaon ki fikron se nikalna hai mujhe

chal paDa hun to usi rah pe chalna hai mujhe

mujh se jo aage hain wo aage na chalne denge

aage baDhna hai to phir rah badalna hai mujhe

waise is 'ahd ki qadron ka taqaza hai yahi

waqt ke sath bahar-haal badalna hai mujhe

mere KHwabon ka bharam toDne wale ye bata

kab talak yunhi gham-e-'ishq mein jalna hai mujhe

zindagi ek mahakta hua jada hi nahin

sirf phulon pe kya kanTon pe bhi chalna hai mujhe

chand aangan mein na utre ye alag baat magar

ek bachche ki tarah roz machalna hai mujhe

gham ka suraj na Dhala hai na Dhalega shayad

barf ki tarh shab-o-roz pighalna hai mujhe

mere mazi ne kiya tark-e-ta'alluq mujh se

ab to har haal mein tanha hi sanbhalna hai mujhe

nafrat-o-bughz-o-hasad ki wo ghuTan hai 'gulshan'

kuchh bhi ho jae ye mahaul badalna hai mujhe