dhup bhi chandni hai saya-e-ashjar se dekh

dhuup bhī chāñdnī hai sāya-e-ashjār se dekh

koī bāzār sahī chashm-e-ḳharīdār se dekh

dā.ere qauseñ ḳhat-e-rañg bayāz-e-dil par

roz ik ālam-e-nau hai tirī raftār se dekh

jāgte sote jazīroñ ke dhuñdalke meñ balā

phir usī tarah mujhe parda-e-inkār se dekh

phir sazā-vār hai tujh ko mire har 'aib se pyaar

pahle tū merā hunar dīda-e-aġhyār se dekh

maiñ ki patthar sahī ta.abīr-e-sanam-ḳhāna huuñ

to mirā sho.ala-e-jāñ teshe kī jhankār se dekh

zad meñ aate rahe tere shah-o-farzīñ kyā kyā

apnī jiitī huī baazī ko mirī haar se dekh

'shāz' sūraj bhī tamāshā.ī huā aaj ke din

ruḳhsat-e-sāya-e-dīvār hai dīvār se dekh

dhup bhi chandni hai saya-e-ashjar se dekh

koi bazar sahi chashm-e-KHaridar se dekh

daere qausen KHat-e-rang bayaz-e-dil par

roz ek aalam-e-nau hai teri raftar se dekh

jagte sote jaziron ke dhundalke mein bala

phir usi tarah mujhe parda-e-inkar se dekh

phir saza-war hai tujh ko mere har 'aib se pyar

pahle tu mera hunar dida-e-aghyar se dekh

main ki patthar sahi tabir-e-sanam-KHana hun

to mera shoala-e-jaan teshe ki jhankar se dekh

zad mein aate rahe tere shah-o-farzin kya kya

apni jiti hui bazi ko meri haar se dekh

'shaz' suraj bhi tamashai hua aaj ke din

ruKHsat-e-saya-e-diwar hai diwar se dekh