dhup girne lagi badan bhar par

dhuup girne lagī badan bhar par

chhāñv rakh de koī mire sar par

baukhlā se ga.e dar-o-dīvār

ek dastak huī kisī dar par

ek be-kār kī zarūrat thī

muskurātī rahī muqaddar par

raat takiye pe buuñd buuñd girī

kaa.ī jamne lagī hai bistar par

saarā din mustaqil tanāv thā

ab hañsī aa rahī hai daftar par

ghar pe rahtā thā ek sāya-e-ġham

aur vo rahtā rahā mire ghar par

bad-gumāñ ho gayā huuñ bāhar se

huuñ maiñ nārāz apne andar par

sīḌhiyāñ ban rahī haiñ sab lahreñ

chāñd utregā kyā samundar par

dhup girne lagi badan bhar par

chhanw rakh de koi mere sar par

baukhla se gae dar-o-diwar

ek dastak hui kisi dar par

ek be-kar ki zarurat thi

muskuraati rahi muqaddar par

raat takiye pe bund bund giri

kai jamne lagi hai bistar par

sara din mustaqil tanaw tha

ab hansi aa rahi hai daftar par

ghar pe rahta tha ek saya-e-gham

aur wo rahta raha mere ghar par

bad-guman ho gaya hun bahar se

hun main naraaz apne andar par

siDhiyan ban rahi hain sab lahren

chand utrega kya samundar par