dhup ka aks kaDi dhup se baDh kar nikla

dhuup kā aks kaḌī dhuup se baḌh kar niklā

maiñ jise aa.ina samjhā thā vo patthar niklā

log dukh dard bhī tanhā nahīñ sahne dete

mere ghar meñ jo tamāshā thā vo ghar ghar niklā

dekh kar chāñd talātum hai bapā siine meñ

maiñ samajhtā thā jise dil vo samundar niklā

us kī yādoñ se baḌī ma.arka-ārā.ī huī

phir kahīñ jā ke mire dil se vo paikar niklā

us ne dastār ko bhī kaasa banā rakkhā hai

maiñ jise shaah samajhtā thā gadāgar niklā

munkashif hone lagā sirr-e-nihāñ bhī mujh par

jūñhī siine se mire vahm kā ḳhanjar niklā

ek din ḳhud se taqābul kiyā maiñ ne apnā

mere andar kā jo insān thā behtar niklā

ḳhud-pasandī kā nasha aisā nasha hai 'ahmad'

maiñ ne jis jis ko bhī dekhā vahī ḳhūgar niklā

dhup ka aks kaDi dhup se baDh kar nikla

main jise aaina samjha tha wo patthar nikla

log dukh dard bhi tanha nahin sahne dete

mere ghar mein jo tamasha tha wo ghar ghar nikla

dekh kar chand talatum hai bapa sine mein

main samajhta tha jise dil wo samundar nikla

us ki yaadon se baDi marka-arai hui

phir kahin ja ke mere dil se wo paikar nikla

us ne dastar ko bhi kasa bana rakkha hai

main jise shah samajhta tha gadagar nikla

munkashif hone laga sirr-e-nihan bhi mujh par

junhi sine se mere wahm ka KHanjar nikla

ek din KHud se taqabul kiya main ne apna

mere andar ka jo insan tha behtar nikla

KHud-pasandi ka nasha aisa nasha hai 'ahmad'

main ne jis jis ko bhi dekha wahi KHugar nikla