dhup ko garm na kah saya-e-diwar na dekh

dhuup ko garm na kah sāya-e-dīvār na dekh

tujh ko chalnā hai to phir vaqt kī raftār na dekh

merī fikroñ se ulajh mujh ko samajhne ke liye

duur se mauj meñ uljhī huī patvār na dekh

un kī rūhoñ ko parakh aadmī haiñ bhī yā nahīñ

sirf sūrat pe na jā jubba-o-dastār na dekh

apne āñgan hī meñ kar fikr-e-numū-e-gulshan

koī jannat bhī agar hai pas-e-dīvār na dekh

in damakte hue lamhāt ke jaadū se nikal

vaqt kī chaal samajh shoḳhī-e-raftār na dekh

ġham se laḌnā hai to phir ġham-zada sūrat na banā

zinda rahnā hai to murdoñ ke ye atvār na dekh

mere naġhmāt ko tafrīh ke kānoñ se na sun

raqs kī pyaas hai āñkhoñ meñ to paikār na dekh

qadrdānī ko marātib ke tarāzū meñ na tol

kaun 'afsar' huā yūsuf kā ḳharīdār na dekh

dhup ko garm na kah saya-e-diwar na dekh

tujh ko chalna hai to phir waqt ki raftar na dekh

meri fikron se ulajh mujh ko samajhne ke liye

dur se mauj mein uljhi hui patwar na dekh

un ki ruhon ko parakh aadmi hain bhi ya nahin

sirf surat pe na ja jubba-o-dastar na dekh

apne aangan hi mein kar fikr-e-numu-e-gulshan

koi jannat bhi agar hai pas-e-diwar na dekh

in damakte hue lamhat ke jadu se nikal

waqt ki chaal samajh shoKHi-e-raftar na dekh

gham se laDna hai to phir gham-zada surat na bana

zinda rahna hai to murdon ke ye atwar na dekh

mere naghmat ko tafrih ke kanon se na sun

raqs ki pyas hai aankhon mein to paikar na dekh

qadrdani ko maraatib ke taraazu mein na tol

kaun 'afsar' hua yusuf ka KHaridar na dekh