dhup nikli to bataegi hai saya kitna

dhuup niklī to batā.egī hai saaya kitnā

apnā hī jism hai apne se parāyā kitnā

ḳhud-shanāsī ke añdheroñ kī ghanī chhāñv tale

mere aaseb ne ḳhud mujh ko Darāyā kitnā

us se bhī ho na sakā apnī jarāhat kā ilaaj

pyaar bhī us ne kiyā dil se lagāyā kitnā

huuñ vo sarmāya jo luTne pe tahī-dast nahīñ

vaqt ne merī udāsī ko churāyā kitnā

ḳhud se bach kar jo mire dil meñ utar aayā thā

us parinde ko havāoñ ne Darāyā kitnā

maqsad-e-ahl-e-junūñ fāsla-bar-dosh rahā

āgahī ne rah-e-manzil ko ghaTāyā kitnā

āhū-e-fikr-e-ramīda tirī ḳhātir maiñ ne

dasht-e-be-sāya meñ lafzoñ ko sajāyā kitnā

tab kahīñ jā ke khilā ḳhāma-e-rangīñ kā gulāb

apne hī ḳhuun meñ 'ajmal' hai nahāyā kitnā

dhup nikli to bataegi hai saya kitna

apna hi jism hai apne se paraya kitna

KHud-shanasi ke andheron ki ghani chhanw tale

mere aaseb ne KHud mujh ko Daraya kitna

us se bhi ho na saka apni jarahat ka ilaj

pyar bhi us ne kiya dil se lagaya kitna

hun wo sarmaya jo luTne pe tahi-dast nahin

waqt ne meri udasi ko churaya kitna

KHud se bach kar jo mere dil mein utar aaya tha

us parinde ko hawaon ne Daraya kitna

maqsad-e-ahl-e-junun fasla-bar-dosh raha

aagahi ne rah-e-manzil ko ghaTaya kitna

aahu-e-fikr-e-ramida teri KHatir main ne

dasht-e-be-saya mein lafzon ko sajaya kitna

tab kahin ja ke khila KHama-e-rangin ka gulab

apne hi KHun mein 'ajmal' hai nahaya kitna