dhup rakh di thi muqaddar ne sirhane mere

dhuup rakh dī thī muqaddar ne sirhāne mere

umr-bhar aag meñ jalte rahe shāne mere

maiñ tire naam kā aamil huuñ vo ab jaan ga.e

hādse ab nahīñ DhūñDheñge Thikāne mere

chāñd sī un kī vo ḳhush-rañg qabā vo dastār

un kī darveshī pe qurbān ḳhazāne mere

mauj-e-rañg aa.ī kuchh is taur ki dil jhuum uThā

hosh gum kar diye sarmast hinā ne mere

phir koī lams mire jism meñ sho.ale bhar de

phir se yuuñ ho ki palaT aa.eñ zamāne mere

jā tujhe chhoḌ diyā ai ġham-e-daurāñ maiñ ne

varna ḳhālī nahīñ jaate haiñ nishāne mere

aisā lagtā thā ki lauT aa.e haiñ guzre hue din

mil ga.e the mujhe kuchh dost purāne mere

zindagī dekh lī maiñ ne tirī duniyā ki jahāñ

vaqt ne chhīn liye ḳhvāb suhāne mere

ab maiñ sāhil pe nahīñ maiñ huuñ tah-e-āb-e-ravāñ

shahr-dar-shahr haiñ hoñToñ pe fasāne mere

gir paḌā sail-e-havādis mire qadmoñ pe 'bashīr'

haath thāme jo buzurgoñ kī duā ne mere

dhup rakh di thi muqaddar ne sirhane mere

umr-bhar aag mein jalte rahe shane mere

main tere nam ka aamil hun wo ab jaan gae

hadse ab nahin DhunDhenge Thikane mere

chand si un ki wo KHush-rang qaba wo dastar

un ki darweshi pe qurban KHazane mere

mauj-e-rang aai kuchh is taur ki dil jhum uTha

hosh gum kar diye sarmast hina ne mere

phir koi lams mere jism mein shoale bhar de

phir se yun ho ki palaT aaen zamane mere

ja tujhe chhoD diya ai gham-e-dauran main ne

warna KHali nahin jate hain nishane mere

aisa lagta tha ki lauT aae hain guzre hue din

mil gae the mujhe kuchh dost purane mere

zindagi dekh li main ne teri duniya ki jahan

waqt ne chhin liye KHwab suhane mere

ab main sahil pe nahin main hun tah-e-ab-e-rawan

shahr-dar-shahr hain honTon pe fasane mere

gir paDa sail-e-hawadis mere qadmon pe 'bashir'

hath thame jo buzurgon ki dua ne mere