dhup ruKHsat hui sham aai sitara chamka

dhuup ruḳhsat huī shaam aa.ī sitārā chamkā

gard jab baiTh ga.ī naam tumhārā chamkā

har taraf paanī hī paanī nazar aatā thā mujhe

tum ne jab mujh ko pukārā to kinārā chamkā

muskurātī huī āñkhoñ se milā izn-e-safar

shahr se duur na jaane kā ishārā chamkā

ek tahrīr ki jo saaf paḌhī bhī na ga.ī

magar ik rang mire ruḳh pe dobārā chamkā

aaj ik ḳhvāb ne phir zehn meñ añgḌā.ī lī

aur tūfān meñ tinke kā sahārā chamkā

sāzgār aane lagī thī hameñ ḳhalvat lekin

jī meñ kyā aa.ī ki phir zauq-e-nazārā chamkā

jhilmilāne lagīñ mahfil meñ charāġhoñ kī laveñ

ruḳhsat ai ham-nafaso sub.h kā taarā chamkā

dhup ruKHsat hui sham aai sitara chamka

gard jab baiTh gai nam tumhaara chamka

har taraf pani hi pani nazar aata tha mujhe

tum ne jab mujh ko pukara to kinara chamka

muskuraati hui aankhon se mila izn-e-safar

shahr se dur na jaane ka ishaara chamka

ek tahrir ki jo saf paDhi bhi na gai

magar ek rang mere ruKH pe dobara chamka

aaj ek KHwab ne phir zehn mein angDai li

aur tufan mein tinke ka sahaara chamka

sazgar aane lagi thi hamein KHalwat lekin

ji mein kya aai ki phir zauq-e-nazara chamka

jhilmilane lagin mahfil mein charaghon ki lawen

ruKHsat ai ham-nafaso subh ka tara chamka