did ke imkan husn-e-irtiqa pane lage

diid ke imkān husn-e-irtiqā paane lage

vo nazar kī had se bāhar bhī nazar aane lage

dekh kar zarroñ ko taare raqs farmāne lage

āsmāñ vaale zamīñ vāloñ kā gun gaane lage

hai isī kā naam dil kā soz merāj-e-hayāt

aadmī ko jab ḳhushī meñ ġham nazar aane lage

soch kar anjām-e-gul ġhunchoñ kī āñkheñ khul ga.iiñ

dekh kar shabnam ke ā.īnoñ ko tharrāne lage

fitratan ab jaag uThī hai manzil-e-zehn-o-shu.ūr

kārvāñ bhaTke hue ḳhud raah par aane lage

gulsitāñ ne pā liyā rāz-e-jamāl-e-jāvedāñ

laakh aa.e ab ḳhizāñ kyoñ phuul murjhāne lage

kis qadar ḳhatre meñ haiñ hosh-o-ḳhirad kī ismateñ

ab to dīvāne bhī farzānoñ ko samjhāne lage

maiñ to kuchh samjhā nahīñ ye isti.āra ai 'shifā'

mere aate hī vo uTh kar bazm se jaane lage

did ke imkan husn-e-irtiqa pane lage

wo nazar ki had se bahar bhi nazar aane lage

dekh kar zarron ko tare raqs farmane lage

aasman wale zamin walon ka gun gane lage

hai isi ka nam dil ka soz meraj-e-hayat

aadmi ko jab KHushi mein gham nazar aane lage

soch kar anjam-e-gul ghunchon ki aankhen khul gain

dekh kar shabnam ke aainon ko tharrane lage

fitratan ab jag uThi hai manzil-e-zehn-o-shuur

karwan bhaTke hue KHud rah par aane lage

gulsitan ne pa liya raaz-e-jamal-e-jawedan

lakh aae ab KHizan kyon phul murjhane lage

kis qadar KHatre mein hain hosh-o-KHirad ki ismaten

ab to diwane bhi farzanon ko samjhane lage

main to kuchh samjha nahin ye istiara ai 'shifa'

mere aate hi wo uTh kar bazm se jaane lage