dida-e-bina hai to hogi hi jalwa-ashna

dīda-e-bīnā hai to hogī hī jalva-āshnā

qatra dariyā-āshnā to sahrā zarra-āshnā

yuuñ to kahne ko sabhī haiñ ek duniyā-āshnā

dil hī jaane hai yahāñ ab kaun kis kā āshnā

itr kitne isti.āroñ ne kiyā un se kashīd

shāḳh par haiñ jhūmte ye phuul sho.ala-āshnā

iktifā nān-e-javīñ par ab kiyā jaatā nahīñ

lazzat-e-kām-o-dahan hai mann-o-salvā-āshnā

ishq ke māroñ ko jab bhī ġhaur se dekhā zarā

dil nahīñ majnūñ-sifat aur aañkh lailā-āshnā

aane vaale vaqt kā timsāl-gar thā us kā fan

'ġhālib'-e-ḳhasta hamāre ahd kā thā āshnā

dida-e-bina hai to hogi hi jalwa-ashna

qatra dariya-ashna to sahra zarra-ashna

yun to kahne ko sabhi hain ek duniya-ashna

dil hi jaane hai yahan ab kaun kis ka aashna

itr kitne istiaron ne kiya un se kashid

shaKH par hain jhumte ye phul shoala-ashna

iktifa nan-e-jawin par ab kiya jata nahin

lazzat-e-kaam-o-dahan hai mann-o-salwa-ashna

ishq ke maron ko jab bhi ghaur se dekha zara

dil nahin majnun-sifat aur aankh laila-ashna

aane wale waqt ka timsal-gar tha us ka fan

'ghaalib'-e-KHasta hamare ahd ka tha aashna