diwana ban ke puchhte hain har kisi se hum

dīvāna ban ke pūchhte haiñ har kisī se ham

tang aa chukī hai zindagī yā zindagī se ham

apne hī shahr meñ koī pahchāntā nahīñ

tanhā khaḌe haiñ moḌ par ik ajnabī se ham

kyoñ kheltī hai ab bhī añdheroñ se zindagī

pūchheñge ye savāl kabhī raushnī se ham

jo chāñd ke qarīb hai insāniyat se duur

ummīd kyā rakheñ bhalā us aadmī se ham

jaane kā is jahāñ se hameñ koī ġham nahīñ

aa.e the yuuñ bhī kab bhalā apnī ḳhushī se ham

duniyā ne 'shauq' lākhoñ fasāne banā liye

bhūle se jab bhī guzre haiñ un kī galī se ham

fursat nahīñ ki soch sakeñ kal kī koī baat

uljhe haiñ 'shauq' is tarah kuchh aaj hī se ham

diwana ban ke puchhte hain har kisi se hum

tang aa chuki hai zindagi ya zindagi se hum

apne hi shahr mein koi pahchanta nahin

tanha khaDe hain moD par ek ajnabi se hum

kyon khelti hai ab bhi andheron se zindagi

puchhenge ye sawal kabhi raushni se hum

jo chand ke qarib hai insaniyat se dur

ummid kya rakhen bhala us aadmi se hum

jaane ka is jahan se hamein koi gham nahin

aae the yun bhi kab bhala apni KHushi se hum

duniya ne 'shauq' lakhon fasane bana liye

bhule se jab bhi guzre hain un ki gali se hum

fursat nahin ki soch saken kal ki koi baat

uljhe hain 'shauq' is tarah kuchh aaj hi se hum