diwana ho ke naz kisi ke uThae kaun

dīvāna ho ke naaz kisī ke uThā.e kaun

hai dil-lagī zarūr magar dil lagā.e kaun

ḳhaslat jafā-shi.ār hai un kī jatā.e kaun

jo aazmā liyā hai use āzmā.e kaun

saaqī nahīñ to hosh meñ rindoñ ko laa.e kaun

jām-o-subū hai sāmne lekin pilā.e kaun

maanā haram ke saa.e meñ yaksar bahisht hai

bazm-e-butāñ ko chhoḌ ke jaa.e to jaa.e kaun

ulfat kī aag baiThe-biThā.e lagā to lī

ab dekhnā ye hai ki lagī ko bujhā.e kaun

ḳhāmoshiyāñ nasīb-e-nazar par muhīt haiñ

ġham-āshnā huuñ giit mohabbat kā gaa.e kaun

hai roz imtihān jahāñ ke nasīb kā

kyā jāniye tumhārī nazar meñ samā.e kaun

ik chashm-e-mai-farosh hai masrūf-e-intiḳhāb

aise meñ ġham-nasīb ko ḳhātir meñ laa.e kaun

har yaas meñ rahe ho mire dil kā aasrā

hai dard kā sharīk tumhāre sivā.e kaun

phir taaza ho rahe haiñ ġham-e-ishq ke nishāñ

chhuptā nahīñ ye raaz to us ko chhupā.e kaun

hikmat zarūr hai pas-e-parda ba-fikr-e-'shād'

hotā nahīñ jo sāmne ho kar ḳhudā-e-kaun

diwana ho ke naz kisi ke uThae kaun

hai dil-lagi zarur magar dil lagae kaun

KHaslat jafa-shiar hai un ki jatae kaun

jo aazma liya hai use aazmae kaun

saqi nahin to hosh mein rindon ko lae kaun

jam-o-subu hai samne lekin pilae kaun

mana haram ke sae mein yaksar bahisht hai

bazm-e-butan ko chhoD ke jae to jae kaun

ulfat ki aag baiThe-biThae laga to li

ab dekhna ye hai ki lagi ko bujhae kaun

KHamoshiyan nasib-e-nazar par muhit hain

gham-ashna hun git mohabbat ka gae kaun

hai roz imtihan jahan ke nasib ka

kya jaaniye tumhaari nazar mein samae kaun

ek chashm-e-mai-farosh hai masruf-e-intiKHab

aise mein gham-nasib ko KHatir mein lae kaun

har yas mein rahe ho mere dil ka aasra

hai dard ka sharik tumhaare siwae kaun

phir taza ho rahe hain gham-e-ishq ke nishan

chhupta nahin ye raaz to us ko chhupae kaun

hikmat zarur hai pas-e-parda ba-fikr-e-'shad'

hota nahin jo samne ho kar KHuda-e-kaun